alwahatech - عينونا يا الخوت بصلاة الهادي البشير

عينونا يا الخوت بصلاة الهادي البشير

ألفين صلاة وسلام على العربي سيد الرجالة ::: نبدا بيها نظمي للحاج محمد بلكبير
وين صلاح توات كاملة لقطاب الفضالة ::: لاغاثة يا لفحول كل طلبوا فالله تسخير
يجعل شفاه قريب بفضل مولانا تعالى ::: يرجع من باريس بلي فيه الخيـــــــــر
الشيخ فقيه توات منافعو ياسر وقبالة ::: مصباح النور في بلادنا يضوي وينير
يضوي فالجزاير كاملة أو ضو يتلالا ::: محمود بين الناس كاملة شيباني وصغير
يوم راد الله العالي مول الجلالة ::: نكتب ذا الشعر للحاج محمد بلكبير
بكات التلاميذ بالقلوب الدمعة هطالة ::: يا من عظم بهاد الفراق يدير الله تيسير
المدرسة في رمضان حازنة على سيد الرجالة ::: من بعد غياب الشيخ عند الله ما داو كثير
الحاج سالم خليفتو فالمجلس يتوال ::: يجيب أمور الدنيا ويشرح لنا بالتفسير
الوقفة في خليل وجميع ابواب الرسالة ::: يذكرها باب باب ما فيها وين يحير
يتلو فالقرآن في جميع أوقات الصلاة ::: خمسة صلوات موقتة فالجامع لكبير
العلماء خلفاء النبي ما فيهم لحتالة ::: مافيهم محقور امتثلو لسنة النبي البشير
منع رحيلو يا الله يا مناع الرحالة ::: تجعل قسمو وافي يا الحي العالي القدير
لي طلبك واجد عندما تصعاب الحالة ::: ما تحتاج لمخلوق ما ترجى منو تدبير
يا ربي لك الحمد من رجع سيدي بعجالة ::: فرحت به توات كاملة شيباني وصغير
قامو به الرياح في فرنسا دوك العقالة ::: أهل النية مهري والحاج العربي بلخير
أولاد الخير صحيح عزهم مولانا تعالى ::: وقت الشدة بانو يا الله تعطيهم لكثير
تلقيهم فالجنة بجاه لفضل مول الرسالة ::: في دار الفردوس جوار الهادي البشير
نحمد ربي ونزيد فالشكر لمول الجلالة ::: نطلبو فالشفا للحاج محمد بلكبير
تحفظ ليه ولاده مع أهله من جميع البلا ::: واحبابو ونسابو دير ليهم تيسير الخير
ا.م.ح.م يلحقها حرف الدال ::: الحاج عبد الله بوه لرحمة المولى فقير
ونقالي معروف وأدرار هذيك عمالة ::: داخل بالعلماء يا الله تجعلو تيسير
تغفر لوالديه مع أهلو وبلادو مكمولة ::: ولأمة محمد كاملة شيباني وصغير
نختمها بالصلاة على المفضل سيد الرجالة ::: إلى يوم النداء ان شاء الله ما فيها تغيير
تسمائة وألف عام ثنين أو تسعين مكمولة ::: سبعة في جهر جوان باش نتورخها تذكير

المرحوم الشــاعر امحمد محجوبي